Maria Motzfeldt

Maria aallakaatitassiornermi ingerlatsisutut, aqutsisutut, oqaaseqartartutut, tusagassiuuteqarfinnit ilisimaneqarluartutut, qiimasutut nuannarineqartutullu tamalaanit ilisimaneqarpoq. Mariap ingerlatitseqqiisinnaanera, kajumissuseqalersitsisinnaanera pitsaalluinnartunillu assiliartalersuisinnaanera (layout) uppernarsaatissaqarluarlutillu tamalaanit qujamasuutigineqarput. Tamanna ass. aallakaatitassiani amerlasuuni Mariap ilisimaneqarlualissutigisaani atuuppoq. Qaqisarfimmi filmiliuutillu saavani nikorfanissani sungiusimalluinnarpaa. Tamatuma saniatigut isumassarsiortutut, periarfissiisunik aaqqiissuteqartartutut, oqaluttuartutut, ilusilersuisutut, oqaatigineqartussanik allattutut internetikkullu attaveqaqatigiittarfinnik isumaginnittutut suliaqarsinnaalluarami suliniutip immikkoortuini assigiinngitsuni isumalluutaalluarsinnaavoq.

Mariap assigiinngitsorpassuit piginnaaneqarfigigamigit aallakaatitassiornermik, saqqummersitsinermik, meeqqanut atuakkiornermik kiisalu sineriatsinni isorartoqisumi qanorluunniit annertussusilinnik aaqqissuulluagaasunillu sammisassaqartitsinernik namminersortutut ukiorpassuarni angusaqarfiulluartumik sulisarsimavoq. Maria amerlaqisunut attaveqartarami inuppassuarnillu nuannarineqarami sumiiffinni ataasiakkaani allanut attaveqarlualipallattarpoq, taamaalillunilu suliniummi angusaqapallattarlunilu siumukartitsipallattarpoq.

Mariap meeqqanut inersimasunullu attaveqarluarsinnaanini kiisalu ataatsimoortunik ilorrisimaalersitsisinnaanini, ineriartortitsisinnaanini kajumissuseqalersitsisinnaaninilu pissutigalugit nunatsinni innuttaasut assigiinngitsorpassuit attaveqarfigisarsimavai. Assersuutigalugu avatangiisinut, peqqinnerulersitsiniarnermut paquminartunilluunniit nungusaanermut tunngatillugu maligassiuisutut siulliulluni iliuuseqallaqqissuuvoq.

Mariap aamma oqaluttuartuunikkut nittarsaassisuunikkullu suliffeqarfinnik naleqarnerulersitsineq iluatsilluartumik suliaqarfigisarsimavaa. Takorluukkamik oqariartuutigineqartumillu tamanut erseqqissaaneq piginnaaneqarfigilluagaasa ilagaat.

Eqikkarlugu oqaatigineqarsinnaavoq Maria ingerlatitseqqiinermik, attaveqaqatigiinnermik nittarsaassinermilluunniit suliniummi tamatigoortumik sullissilluarsinnaasoq. Meeqqanut atuakkiornermiit nittarsaassinermut tunngatillugu anguniagaasunik sunilluunniit pilertortumik pitsaalluinnartumillu piviusunngortitsisinnaavoq.

Rasmusip Laurallu ilisimatusarnikkut misissueqqissaarnikkullu piginnaasaat Mariallu kajumissuseqalersitsisinnaanera eqqarsaatigalugit meeqqanut inuusuttunullu susassaqarfinni suliaqarfinnilu allani periarfissat annertuut pilersilluarneqarsinnaapput.