INUVA – Inuk, Nutaaliorneq, Ineriartorneq, Alliartorneq aamma Paasiniaaqqissaarneq
Tamatta sisamaalluta suliffeqarfinni inuiaqatigiinnilu ineriartortitsinissamik, nutaaliornissamik, pitsaasunik angusaqarnissamik ulluinnarnilu inuunermik oqinnerulersitsinissamik pingaartitsisuuvugut. Tamatta immikkut qiimasuullutalu inussiarnersuuvugut. Aamma allanik nukissaqalersitsisartutut, siumukarnissamik isumassarsisitsisartutut kiisalu aallussilluarnikkullu ingerlariaqqinnissamut ikiuisartutut ilisimaneqarpugut.
Suleqatigiittut peqqissaartuunissaq, qanilaartuunissaq, unneqqarissuunissaq inuppalaarnissarlu pingaartippavut. Sullissinernik nunap immikkoortuini tamani inuttut angusaqarfiulluartunik neqerooruteqarsinnaanerput tulluusimaarutigaarput. Inuit tamaneersut peqatigiiffiillu assigiinngitsorpassuit suleqatigisarpavut.
Inuit killiffitsik aallaavigalugu pitsaanerpaamik ingerlariaqqissinnaanerat ineriartorsinnaanerallu pillugu najoqqutassiaq tunngavigalugu sulisarpugut. Taamaattumik nioqqutitta ineriartortinnginnerani inuit pissutsit atugaat najukkamilu peqatigiiffik sumiiffillu pillugit ilisimasariaqakkat paasiniaqqaarlugit sulisarpugut. Tassa siunissaq pillugu ineriartortitsiumalluta maanna pisut aallaavigisariaqarpavut.
INUVA KIKKUUPPAT?
Rasmus ilinniagartuujuvoq periusissiornermik suliniummillu aqutsinermik ilisimasaqarluartoq.
Maria aallakaatitassiornermi ingerlatsisutut, aqutsisutut, oqaaseqartartutut, tusagassiuuteqar-finnit ilisimaneqarluartutut, qiimasutut nuannarineqartutullu tamalaanit ilisimaneqarpoq.
Claus suliffeqarfinni ataasiakkaani, illoqarfinni nunallu immikkoortuini periarfissat pitsanngorsarneqarsinnaasullu suussusersinissaannut piginnaaneqarluarpoq.
Emil pitsaalluinnartumik allannguisitsisartuuvoq, periarfissanik ammaasartuuvoq soqutigisanillu isumaginnittartuulluni. Isumassarsiap piviusunngortinnissaa Emilip pikkoriffigilluinnarpaa.
